تسريب لاجتماع سرى معارض سنة 2030!

الحكاية 0 تعليق 14 ارسل لصديق نسخة للطباعة

فى عام 2030 وفى حجرة مغلقة، يجلس مجموعة من الشباب والبنات الهاى كلاس جدا.. قصات شعر غريبة وبنطلونات مقطعة وباجى ووست لو وتيشرتات عليها جماجم وخلافه.. ومجموعة من اللاب توبات.. وفرش رسم وبعض الأدوات الأخرى. يدخل ميمى صاحب البيت
ميمى: الحمد لله ماما وبابا ناموا عشان نشتغل براحتنا
توتو: كويس ياميمى.. مشكلتهم انهم خايفين عليك زيادة عن اللزوم.
يتحدث ميمى بدلع: كل شوية يقولوا خايفين عليك من المجهود النضالى، وانا قلتلهم اننا كلنا ف (لنش) واحد فى البلد دى، بنعيش تحت نفس الـ (سكاى) وبنشوف نفس الـ (موون) وبنبقى حرَّانين من نفس الـ (صن)
يقاطعه شوشو: وف (شرم) برضه ياميمى.. بنبقى حرانين جدا والجو بيبقى فظيع
فافى: مشكلتهم انهم فاكرين ان نضالهم كان أصعب.. على الأقل هما كان عندهم طرابيش بيغطوا راسهم بيها من الحر فى الشوارع، انما احنا بنسهر طول الليل على الفيس بوك ننادى بالنضال
ميمى: ياجماعة سيبكم من الكلام ده.. لازم ننفض لكل الكلام ده ونفكر هنعمل إيه فى نضالنا ضد العدو؟ إيه رأيك ياشوشو؟
شوشو: أنا رأيى نعمل جروب على الفيس بوك اسمه (تيجى نناضل قدام العدو؟) ونسأل فيه الناس هل ياترى هما بجد عايزين يناضلوا وبنادق وخوذات وحوارات من دى.. وللا احنا ممكن نعيش مع العدو فى البلد ونبقى (بييس) يعنى؟
ميمى: فكرة كويسة.. وممكن ننزِّل على الجروب كمان أغانى لزمن الفن الجميل فضل شاكر وجنات وأوكا وأورتيجا عشان الناس يشتركوا
فافى: تمام كده.. أنا بقى ممكن أكلم سوزى صاحبتى.. مامتها عندها أتيليه يجنن.. ممكن تفصَّل لنا ستايلات للنضال تحفة..
توتو: كويس بس ماتنسيش تاخدى المقاسات بتاعتنا كلها.. عشان كل واحد يبقى التيشرت بتاع النضال على مقاسه
شوشو: ياجماعة انتوا ناسيين حاجة مهمة.. ازاى هنناضل واحنا مش عندنا مخزون أكل وشرب؟
ميمى: فعلا .. احنا حماسنا النضالى نسانا حاجة مهمة زى دى
شوشو: عموما انا عندى الحل.. أنا هانزل بكرة كارفور.. أجيب كام صندوق كانز.. ومعلبات أكل وكايزر وكام علبة جبنة ريكفورد.. وكام كرتونة مية معدنية.. وانا عارف اننا هنصبر وهنكافح سوا.. وممكن بشوية صبر الكان الواحدة تكفى اتنين
ميمى: عموما احنا كده كلنا متفقين.. باقى بس ان دودو يبعت رسايل اس ام اس على موبايلات الشلة عشان ساعة الصفر
شوشو: وساعة الصفر هتبقى إمتى ياكبير؟
ميمى: ممكن تبقى بعد ماتش الاسكواش اللى بين سوسو وهايدى.. عشان نبقى كلنا حماس.. يللا بينا
شوشو: يللا بينا على فين؟
ميمى: نلعب شوية بلاى ستيشن لحد ما ييجى وقت النضال
شوشو: ده انا هاقطعكم

إخترنا لك

أخبار ذات صلة

0 تعليق